കലാഭവൻ ലണ്ടൻ ഡയറക്ടർ ജയ്‌സൺ ജോർജ്, ഷീന ജയ്‌സൺ, റാണി ജേക്കബ്,ഡെയ്‌സി ജോസഫ്, റോസീന പരിപാടികൾക്ക് തുടങ്ങിയവർ നേതൃത്വം നൽകി.
ഉച്ചകഴിഞ്ഞു നടന്ന വാശിയേറിയ സിനിമാറ്റിക് ഡാൻസ് മത്സരത്തിൽ സർഗം ഡാൻസ് കോവെന്ററി ഒന്നാം സ്ഥാനവും (500 പൗണ്ടും ട്രോഫിയും സർട്ടിഫിക്കറ്റും) നാച്ചോ സ്വാഗ് രണ്ടാം സ്ഥാനവും (300 പൗണ്ടും ട്രോഫിയും സർട്ടിഫിക്കറ്റും) ഡൈനാമിക് ഡ്യുയോ മൂന്നാം സ്ഥാനവും (200 പൗണ്ടും ട്രോഫിയും സർട്ടിഫിക്കറ്റും) നേടി.
പ്രമുഖ നർത്തകരും കോറിയോഗ്രാഫറുമായ തബു, യെദു കൃഷ്‌ണ തുടങ്ങിയവർ വിധികർത്താക്കളും, ഡാൻസ് ഫെസ്റ്റ് കോർഡിനേറ്റേഴ്‌സും ആയിരുന്നു.
ഉൽഘാടന സമ്മേളനത്തിന് ശേഷം നടന്ന പുരസ്‌ക്കാര ദാന ചടങ്ങിൽ യുകെയിലെ മലയാളി സമൂഹത്തിൽ കലാസാഹിത്യ സാംസ്ക്കാരിക രംഗങ്ങളിൽ സമഗ്ര സംഭാവന നൽകിയവരെ ആദരിച്ചു.
യുകെ മലയാളികൾ നാമ നിർദ്ദേശം ചെയ്തവരിൽ നിന്നും കൊച്ചിൻ കലാഭവൻ സെക്രട്ടറിയും, കേരളാ സംഗീത നാടക അക്കാദമി മെമ്പറുമായ ശ്രീ കെ എസ് പ്രസാദും കൊച്ചിൻ കലാഭവൻ ഡയറക്ടറും പ്രശസ്‌ത സംഗീത സംവിധായകനുമായ ശ്രീ : ഇഗ്നേഷ്യസും (ബേണി ഇഗ്‌നേഷ്യസ്) അംഗങ്ങങ്ങളായ ജൂറിയാണ് പുരസ്‌ക്കാര ജേതാക്കളെ പ്രഖ്യാപിച്ചത്
മനോജ് ശിവ (നാടകം, സംഗീതം,സാംസ്ക്കാരികം)
കാനേഷ്യസ് അത്തിപ്പൊഴിയിൽ (സിനിമ,സാംസ്ക്കാരികം)
അജിത് പാലിയത്ത് (മലയാള ഭാഷ,സാംസ്ക്കാരികം)
മണമ്പൂർ സുരേഷ് (സാഹിത്യം സാംസ്ക്കാരികം, സിനിമ)
ബാലകൃഷ്ണൻ ബാലഗോപാൽ (മാധ്യമം, സാംസ്ക്കാരികം)
ബാൾഡ്വിൻ സൈമൺ (നാടകം)
നൈസ് സേവ്യർ (കലാഭവൻ നൈസ്) (നൃത്തം)
ജോമോൻ മാമ്മൂട്ടിൽ (കലാ-സാംസ്ക്കാരികം)
മുരളി മുകുന്ദൻ (മലയാള ഭാഷ -സാഹിത്യം, സാംസ്ക്കാരികം)
രശ്‌മി പ്രകാശ് (മലയാള ഭാഷ -സാംസ്ക്കാരികം)
ദീപ നായർ (നൃത്തം, സാംസ്ക്കാരികം)
മീര മഹേഷ് ( നൃത്തം)
തുടങ്ങിയവരാണ് പുരസ്‌ക്കാര ജേതാക്കൾ, കൂടാതെ ശാരിക അമ്പിളി, മനോജ് മാത്രാടൻ തുടങ്ങിയവർ പ്രത്യേക അവാർഡിനും അർഹരായി .
ഗുരുപ്രഭ ലണ്ടൻ അവതരിപ്പിച്ച വിഷു ദിന നൃത്തത്തിൽ റാണി രഘുലാൽ, സൗമ്യ ഷൈജു, സീന അജീഷ്, അഥീന ആൻഡ്രൂസ്, ഗ്രീഷ്‌മ അഖിലൻ തുടങ്ങിയവർ അണിനിരന്നു. അൽഫോൻസാ കുര്യനും ജെന്നിസ്‌ കുര്യനും ചേർന്നവതരിപ്പിച്ച വിസ്‌പേർസ് ഓഫ് ലവ് എന്ന നൃത്ത രൂപം അതി മനോഹരമായിരുന്നു, സൂമ്പ ഇൻസ്ട്രറ്ററും ഡാൻസറുമായ ആർച്ച അജിത് നേതൃത്വം നൽകിയ സൂമ്പ ഡെമോ കാണികളിൽ ആവേശമുണർത്തി, മുഹമ്മദ് അഷ്‌റഫ് (ആബ്രോ) നേതൃത്വം നൽകിയ വൺ മാൻ ഷോയും പരിപാടികൾക്ക് മിഴിവേകി. ജെസ്‌ന ഈവന്റ് ഹോസ്റ്റ് ആയിരുന്നു
തുടർന്ന് കലാഭവൻ ലണ്ടന്റെ കലാകാരന്മാർ അവതരിപ്പിച്ച നൃത്ത സംഗീത നാടകം “ചെമ്മീൻ” കാണികൾക്ക് ദൃശ്യ വിസ്‌മയമായി.
സിനിമയിലെ ചെമ്മീൻ നാടക വേദിയിലേക്ക് പകർന്നു മാറുകയായിരുന്നു. അങ്ങനെ പരീക്കുട്ടിയും കറുത്തമ്മയും ലണ്ടൻ വേദിയിൽ നിറഞ്ഞു നിന്നു. ചെമ്മീൻ സിനിമയുടെ ഗ്രുഹാതുരത്വത്തോടു കൂടി എത്തിയ നാടകാസ്വാദകരെ തെല്ലൊന്നുമല്ല ഈ പരിണാമം ആസ്വദിപ്പിച്ചത്.
ജയ്സൻ ജോർജും ജിത അരുണും പ്രേമവും, പ്രേമ നൈരാശ്യവും മോഹവും, മോഹഭംഗങ്ങളും ആ അനശ്വര പ്രേമകഥയുടെ തീവ്രതയോടെ അവതരിപ്പിച്ചു. ചെമ്പൻ കുഞ്ഞും ചക്കി മരക്കാത്തിയും ബോൾഡ്വിൻ സൈമന്റെയും, വിമല പരേരയുടെയും കൈകളിൽ സുരക്ഷിതമായിരുന്നു. പളനിയായി ജെയിൻ K ജോണും അച്ചൻകുഞ്ഞായി കീർത്തി സോമരാജനും, നല്ലപെണ്ണായി യാമിൻ മിഥുനും തുറ അച്ചനായി മുരളീധരൻ വിദ്യാധരനും തിളങ്ങി. ശ്രേയ മേനോന്റെ പഞ്ചമിയും കാണികളുടെ മനസ്സിൽ ഇടം പിടിച്ചു. വത്സലൻ , ജതിൻ തോമസ്, സുനിത്ത്, ഹരീഷ്, വിമൽ എന്നിവർ മറ്റു കഥാപാത്രങ്ങളെ അവതരിപ്പിച്ചു.
നൃത്ത രംഗത്ത് സൗമ്യ ഷൈജു, റാണി രഘുലാൽ, അമ്മു സാമുവേൽ, ധന്യ കെവിൻ, ജെയ്‌സി ജെയ്‌മോൻ, പൂജ തമ്പി തുടങ്ങിയർ വേഷമിട്ടു. സൗമ്യ ഷൈജു നൃത്തം കൊറിയോഗ്രാഫി ചെയ്തു. വത്സലനും സുഭാഷ് പിള്ളയും രാജേഷ് കരുണാകരനും സാങ്കേതിക സഹായം നൽകി.
സിനിമയിൽ നിന്നും നാടകത്തിലേക്ക് വന്നതായിരുന്നു ലണ്ടനിൽ അവതരിപ്പിച്ച ചെമ്മീൻ,. ചെമ്മീൻ സിനിമ കണ്ടാസ്വദിച്ച ഒരാൾക്കു ഈ നാടകം കൊണ്ട് പോകുന്ന ഒഴുക്കിൽ നിന്നും മാറി നിൽക്കാനാവില്ല. കൊച്ചിൻ കലാഭവൻ ലണ്ടന്റെ സാരഥി കൂടിയായ ജയ്‌സൺ ജോർജാണ് ചെമ്മീൻ സംവിധാനം ചെയ്തവതരിപ്പിച്ചത്. നല്ലൊരു പരീക്ഷണം അതീവ ഹൃദ്യതയോടെ അരങ്ങിലെത്തിച്ചുവെന്നഭിമാനിക്കാം. ചെമ്മീൻ കൂടുതൽ വേദികളിലേക്കെത്തും എന്നുറപ്പാണ്.
നവരുചി യുടെ നാടൻ ഭക്ഷണം പരിപാടികൾ കൂടുതൽ ആസ്വാദ്യകരമാക്കിതീർത്തു
A review of the play Chemmeen, by Ajith Paliath (credit: Facobook/Ajith Paliath)
തകഴിയുടെ വിശ്വവിഖ്യാത നോവൽ ചെമ്മീനിന്റെ നാടകാവിഷ്കാരം ലണ്ടനിൽ കഴിഞ്ഞ ദിവസം അവതരിപ്പിക്കുകയുണ്ടായി. ചെമ്മീൻ നോവലിന്റെ നാടകരൂപം പല അരങ്ങിൽ പലയിടങ്ങളിൽ അവതരിപ്പിച്ചിട്ടുണ്ടെങ്കിലും തികച്ചും വ്യത്യസ്തമായ അവതരണം തന്നെയായിരുന്നു. നാടകാവതരണത്തിലും രംഗസജ്ജീകരണത്തിലും കാലത്തിനനുസരിച്ച മാറ്റങ്ങൾ ഉൾക്കൊണ്ട് ഒരു ഡ്രാമാസ്കോപ്പ് നാടകത്തിന്റെ ദൃശ്യഭംഗിയോടെ വേദിയിൽ അവതരിപ്പിച്ചപ്പോൾ മുന്നൂറോളം വരുന്ന ആസ്വാദകർ കണ്ണിമചിമ്മാതെയാണ് കഥാപാത്രങ്ങളുടെ ചംക്രമണങ്ങളും അവയ്ക്കിടയിലെ ഭാവപ്പകർച്ചകളുംസാമൂഹിക അനാചാരങ്ങളും അസമത്വങ്ങളും കൊടികുത്തി വാഴുന്ന ആ കാലഘട്ടത്തിലാണ് കേരളക്കര അന്നുവരെ കണ്ടുവന്ന തമിഴ് ഭാഷയുടെ സ്വാധീനമുള്ള സംഗീതനൃത്ത നാടകങ്ങളിൽ നിന്ന് വ്യത്യസ്തമായി, സാമൂഹിക ജീവിതങ്ങളുടെ നേരും നെറിയും കാണിച്ചുതരുന്ന ഒരു നാടകസങ്കല്പം കേരളത്തിൽ പിറവികൊള്ളുന്നത്. ‘അടുക്കളയിൽ നിന്ന് അരങ്ങത്തേക്ക്, അശ്വമേധം, നിങ്ങളെന്നെ കമ്യുണിസ്റ്റാക്കി’ തുടങ്ങി പലനാടകങ്ങളും കേരളസമൂഹത്തിൽ ചലനങ്ങൾ സൃഷ്ട്ടിക്കുകയും പുതിയൊരു ആസ്വാദക സദസ്സിനെ ഉണ്ടാക്കിയെടുക്കുകയും ചെയ്തു.
കടലിന്റെ പശ്ചാത്തലത്തില്‍ പറഞ്ഞ അതിമനോഹരമായ ഒരു പ്രണയകാവ്യം തന്നെയായിരുന്നു തകഴിയുടെ ‘ചെമ്മീൻ’.
കറത്തമ്മയെന്ന ചെമ്പൻകുഞ്ഞിന്റെ തലയും മുലയും വന്ന മകൾക്ക് നാലാം വേദക്കാരനോട് തോന്നിയ പ്രണയം ഒരച്ഛന്റെ ശാഠ്യങ്ങൾക്ക് മുന്നിൽ കെട്ടുപോവുകയായിരുന്നു. കറത്തമ്മയ്ക്കും പഞ്ചമിക്കും വേണ്ടി നല്ലൊരു അച്ഛനാവാനോ ചക്കി മരക്കാത്തിക്ക് വേണ്ടി നല്ലൊരു ഭർത്താവാകാനോ പറ്റാതെ ജീവിതത്തിൽ എടുത്ത ഓരോ തീരുമാനങ്ങളും പിഴച്ചുപോയ ചെമ്പൻകുഞ്ഞിന്റെ മനോനില തെറ്റിയ ജീവിതം കടാപ്പുറത്ത് അലയൊളി നിറയ്ക്കുമ്പോൾ, അങ്ങകലെ ഒരുമിച്ച് ജീവിക്കാൻ അനുവദിക്കാത്ത സമൂഹത്തിനോടുള്ള പ്രതിഷേധമായി സ്വജീവനെ കടലമ്മയ്ക്ക് സമർപ്പിച്ച പരീക്കുട്ടിയുടേയും കറത്തമ്മയുടേയും നിശ്ചലമായ ശരീരം കൈകൾ കോർത്ത് കടൽത്തീരത്ത് അടിഞ്ഞു കിടക്കുകയായിരുന്നു. ‘കരയില്‍ കഴിയുന്ന അരയത്തിയുടെ ചാരിത്ര്യശുദ്ധി കൊണ്ടാണ് കടലില്‍പോയ അരയന്‍ അപകടം കൂടാതെ കരയില്‍ തിരിച്ചെത്തുന്നത് ‘ എന്ന് അരയന്മാരിൽ രൂഢമൂലമായ (അന്ധ)-വിശ്വാസത്തെ ബലപ്പെടുത്താൻ പളനിയും കടലമ്മയുടെ അടിത്തട്ടിലേക്ക് മറഞ്ഞു പോയി. ഇവയെല്ലാം സമം ചേർത്ത് ഒരുക്കിയ ഡ്രാമാസ്കോപ്പ് പോലുള്ള രംഗങ്ങളുടെ മനോഹരമായ ദൃശ്യാവിഷ്കാരമായിരുന്നു കൊച്ചിൻ കലാഭവൻ ലണ്ടൻ അവതരിപ്പിച്ച ചെമ്മീൻ നാടകത്തിൽ കണ്ടതും.
പണ്ട് നാടകരംഗങ്ങളിൽ മിന്നൽവേഗത്തിൽ മാറിമറിയുന്ന ബാക്ഡ്രോപ്പ് കർട്ടനുകൾ കൊണ്ടും ശബ്ദ-വെളിച്ച സാങ്കേതികവിദ്യകൾ കൊണ്ടും കാണികളിൽ ആകാംഷയുടെ മുൾമുനകൾ സൃഷ്ടിച്ചിരുന്നുവെങ്കിൽ ഇന്ന് ആധുനിക ഡിജിറ്റൽ സാങ്കേതിക വിദ്യയിലൂടെ ശബ്ദവും വെളിച്ചവും ഒപ്പം നാടക രംഗങ്ങളും മുഹൂർത്തങ്ങളും സമന്വയിപ്പിച്ച് LED wall-ന്റെ പാശ്ചാത്തലത്തിൽ ആസ്വാദകരിലേക്ക് എത്തിക്കുവാൻ സാധിക്കുന്നുണ്ട്. ലണ്ടനിൽ അരങ്ങേറിയ ചെമ്മീൻ നാടകത്തിലും ഈ സാങ്കേതികവിദ്യയുടെ സാദ്ധ്യതകൾ പരമാവധി പ്രയോജനപ്പെടുത്താൻ ശ്രമിച്ചിരുന്നു. പ്രൊഫഷണൽ നാടകങ്ങളാണെങ്കിലും കാണികളെ പിടിച്ചിരുത്തുക എന്നത് ഒരു നിസാര കാര്യമല്ലല്ലോ. അതിൽ ജെയ്സണും ടീമും വിജയിച്ചിരിക്കുന്നു.
ലണ്ടനിലെ നാടകരംഗത്തെ പ്രമുഖ കലാകാരന്മാരായ ബ്ലാഡ്വിൻ സൈമൺ ( ചെമ്പൻ കുഞ്ഞ് ) ജെയ്‌സൺ ജോർജ് ( പരീക്കുട്ടി ) ജെയിൻ ജോണ് ( പളനി ) കീർത്തി സോമരാജൻ ( അച്ചൻ കുഞ്ഞ് ) ജിത അരുൺ ( കറുത്തമ്മ ) യാമിൻ മിഥുൻ ( നല്ല പെണ്ണ് ) വിമല പെരേര ( ചക്കി മരക്കാത്തി ) ശ്രേയ മേനോൻ ( പഞ്ചമി ) മുരളീധരൻ വിദ്യാധരൻ ( തുറയിൽ അച്ചൻ ) എന്നിവർക്കൊപ്പം വത്സലൻ , ജതിൻ , സുനിത്ത്, ഹരീഷ്, വിമൽ എന്നിവരും സൗമ്യ ഷൈജു, റാണി രഘുലാൽ, അമ്മു സാമുവേൽ, ധന്യ കെവിൻ, ജെയ്‌സി ജെയ്‌മോൻ, പൂജ തമ്പി എന്നീ നർത്തകികളും നാടകത്തിൽ വേഷമിട്ടു . കൊച്ചിൻ കലാഭവൻ ലണ്ടന്റെ അമരക്കാരനായ ജെയ്‌സൺ ജോർജ്‌ജാണ് ചെമ്മീൻ നാടകം സംവിധാനം ചെയ്തത്. ഏതാണ്ട് മൂന്ന് മണിക്കൂർ ദൈർഘ്യമുള്ള നാടകമാണ് കഥാസാരം വിടാതെ അപ്രസക്തമായ ചില രംഗങ്ങൾ ഒഴിവാക്കി വേദിയിൽ അവതരിപ്പിച്ചത്.കേരളത്തിലെ തീരപ്രദേത്തെ അരയ-മുക്കുവരുടെ ആചാരങ്ങളും, വിശ്വാസങ്ങളും, അനുഷ്ഠാനങ്ങളും സംഭാഷണങ്ങളും തുടങ്ങി അവരുടെ ജീവിതത്തിലെ പരുക്കന്‍ യാഥാര്‍ത്ഥ്യങ്ങളെല്ലാം തന്നെ ഈ നാടക അവതരണത്തിലൂടെയും അഭിനയത്തിലൂടെയും കൊണ്ടുവരാൻ അഭിനേതാക്കളും സംവിധായകനും ആത്മാർത്ഥമായി ശ്രമിച്ചിട്ടുണ്ട്. നാടകത്തിലെ കഥാപാത്രങ്ങളോട് നൂറു ശതമാനം കൂറുപുലർത്തുന്ന രീതിയിൽ തന്നെയാണ് വേഷസംവിധാനങ്ങളും പ്രോപ്പർട്ടികളും ഉപയോഗിച്ചത്.
നാടകത്തിന്റെ മുന്നിലും അണിയറയിലും പ്രവർത്തിച്ചവർക്ക് അഭിനന്ദനങ്ങൾ . 
Leave a Reply